“ሕግ መንግሥቱን ለማስጠበቅ፣ ለመመከት እና ለመከላከል አቅሜ በፈቀደው ሁሉ ኃላፊነቴን በታማኝነት ለመወጣት ቃል እገባለሁ። ለዚህም ፈጣሪ ይርዳኝ!” በማለት ቃለ መሐላቸውን የፈፀሙት 47ኛው የዩናይትድ ስቴትስ ፕሬዝዳንት ዶናልድ ትራምፕ ገፃቸው ፈገግታ አልባ ነበር። ዋሽንግተን ውስጥ በሚገኘው በምክር ቤቱ ህንጻ “ካፒቶል ሮቶንድ” አዳራሽ በተከናወነው ሥነ ሥርዐት ላይ ልክ ኮስተር ብለው እንደተነሱት ኦፊሴላዊ ፎቶ ሁሉ ፊታቸው እንደጨፈገገ ነበር። ወደ መድረኩ ወጥተው ንግግራቸውን ሲጀምሩ ብቻ ነው ፊታቸው ትንሽ ፈታ ያለውና “የአሜሪካ ወርቃማ ዘመን” መጀመሩን ያበሰሩት።”ከዚህ ቅጽበት ጀምሮ የአሜሪካ ውድቀት አብቅቷል” የሚል ንግግር ከተሰናባቹና ለግማሽ ምዕተ ዓመት አገራቸውን ያገለገሉት ጆ ባይደን በተቀመጡበት አሰምተዋል።

ከስምንት ዓመት በፊት ለመጀመሪያ ጊዜ ሲመረጡ እንዳደረጉት ንግግር ሁሉ ለአሜሪካ ሕዝብ “ጥንካሬን” የማስመለስ አላማቸውን ገልፀዋል።የትናንቱ ንግግር ከዚህ ቀደሙ አጠር ያለ ግን ጠንከር ያለ ሲሆን፤ ይህም የሀገራቸው ድንበርና በሀገሪቱ በህገ ወጥ መንገድ የሚገኙ ዜጎችን በብዛት ማባረር፣ አሜሪካ በሌሎች አገሮች ላይ “የሚኖራትን ዘላቂ የበላይነት” የሚገልፅ ነበር። “አሜሪካ የወደቀበችበት የአራት ረጅም ዓመታት መጋረጃ ይዘጋና አዲስ የአሜሪካ ጥንካሬ እና የብልጽግና ቀን እንጀምራለን” ብለዋል። በሜክሲኮ ድንበር የአስቸኳይ ጊዜ አዋጅ እንደሚደነግጉ ሲናገሩ ሞቅ ያለ ጭብጨባ ተደርጐላቸዋል። ትራምፕ ኃይል ለማመንጨት የሚደረግ ቁፋሮ እንደሚቀጥል (« Drill, baby, drill ») በማለት፣ ገልፍ ኦፍ ሜክሲኮ ገልፍ ኦፍ አሜሪካ እንደሚባል (በዚያች ቅጽበት ሂላሪ ክሊንተን በማሾፍ አይነት ሳቅ አፍኖ ሲታገላቸው ይታያሉ) ና ፓናማ ካናልን አሜሪካ እንደምትወስድ ፤ ግዛቷንም እስከማርስ ድረስ እንደምታሰፋ ተናግረዋል።

በዋሽንግተን ዲሲ አካባቢ ባለው ከባድ ብርድ ምክንያት የተነሳ ሥነ ሥርዐቱ ምክር ቤት ህንጻ “ካፒቶል ሮቶንድ” ስለተደረገ በርካታ ሰው ተጨናንቆ ነበር። ይህ ሥነ ሥርዓት ሮናልድ ሬገን በ1985 ዓ/ም ካደረጉት የቤት ውስጥ በአለ ሲመት ወዲህ የመጀመርያው ነው። በቃለ መሐላ ሥነ ስርዐት ላይ የቀድሞዎቹ ፕሬዝዳንቶች ጆርጅ ቡሽ፣ ቢል ክሊንተንና ባራክ ኦባማ ሲገኙ እንደ አሌክሳንድሪያ ኦካሲዮ ኮርቴዝ ያሉ አንዳንድ ዲሞክራሲያዊ አባላት ለመታደም ፍቃደኛ ሳይሆኑ ቀርተዋል።የቴስላና የኤክስ ባለቤት ኢላን መስክ፣ የአማዞኑ ጄፍ ቤዞስ፣ የሜታው ማርክ ዘከርበርግ እና የቲክቶክ የሥራ አስፈጻሚ ሹ ዚ ቼውም ፊት ለፊት ተቀምጠው ነበር። የትዳር አጋሮቻቸውም በገዥዎችና በኮንግረስ አባላት ሊያዝ የሚገባውን ወንበር ተቀምጠውበታል። በአሜሪካ የፕሬዚዳንት በዓለ ሲመት መሪዎችን መጋበዝ ያልተለመደ አሠራር ቢሆንም የጣሊያን ቀኝ አክራሪ ፓርቲና ጠቅላይ ሚንስትር ጆርጂያ መሎኒ፣ የአርጀንቲናው ፕሬዝደንት ሃቪየር ሚሌና የቻይና ምክትል ፕሬዝደንት ሃን ዤንግ፣ በዝግጅቱ ላይ ታድመዋል።

ዶናልድ ትራምፕ በግግራቸው በሐማስ ተይዘው የነበሩት የእስራኤል ታጋቾችን በማስለቀቅ የነበራችውን ሚና ከገለፁ በኋላ ለሰላም የቆሙና አገሪቱን አንድ ለማድረግ የቆሙ መሆናቸውን ገልፀዋል። ትራምፕ “አንድነት” የሚሉት በራሳቸው አተያይ መሆኑ እንዳለ ሆኖ። የ”አሜሪካንን ውድቀት” በተጋነነ መልኩ ማቅረብ፣ የፖለቲካ ባለንጣዎቻቸው ላይ ማላገጥና ማሾፍ፣መውቀስ እንዲሁም ሀገራዊ አንድነት ለማምጣት የገቡትን ቃል የሚፃረር ሃይል የተቀላቀበት ንግግር ማድረግ። ፕሮግራሙ ላይ የነበረው የፀሎትና የስብከት ሥነሦርዐት አንድነትን አያንፀባርቅም ነበር። ፓስተሮችና የአይሁድ ካህናት ለMAGA ተከታዮች የሚመች ፀሎትና የትራምፕን ጠላቶቹን የሚያወግዝ መልዕክት ሲያስተላልፉ በፕሮግራሙ ላይ ቡራኬ ያቀርባሉ ተብለው ይጠበቁ የነበሩት የሚሺጋን ኢማም በመጨረሻው ሰዓት ላይ እንዳይሳተፉ ተደርገዋል።በምርቃት ላይ ንግግር ያደረጉት የሚኒሶታ ዴሞክራቲክ ሴናተር፥ ኤሚ ክሎቢሻር ይህ ሥነ ሥርዓት እዚህ በካፒቶል የሚከናወንበት ምክንያት አለ በማለት ተናግረዋል።”በሌሎች አገሮች፣ በፕሬዝዳንታዊ ቤተ መንግሥቶች፣ በቢሮ ሕንፃ ውስጥ ሊሆን ይችላል እዚህ ግን የህዝቡ ቤት ተብሎ በሚወሰደው አዳራሽ ነው የሚደረገው።ይሄም የዴሞክራሲያችን መሰረት የሆነው የመቆጣጠር፣ ማመጣጠን (ሚዛን መጠበቅ) ሥርዓት እንዳይዘነጋ ተገቢ ማሳሰቢያ ነው” ብለዋል።”ሦሥቱ የመንግሥት አስተዳደር ቅርንጫፎች ለ250 ዓመታት ያህል በሕግ የበላይነት ላይ የተመሰረተው ታላቁ የአሜሪካ ዴሞክራሲያችን እንደ መሠረት ድንጋይ ሆኗል።” ሲሉም አክለዋል።

ከታላቅ ብርድ ጋር፥ በውጭ ያለው ድባብ ከውስጡ የተለየ ነበር። በሺዎች የሚቆጠሩ ናሽናል ሞል ተብሎ በሚጠራው ከምክር ቤቱ ህንፃ ደጃፍ መስክ ላይ ተሰብስበው በስልካቸው በዓለ ሲመቱን ሲከታተሉ ነበር፡፡ ብዙዎቹ የ MAGA ኮፊያ አጥልቀው በአካባቢው ያሉ ካፌዎችንና ቡና ቤቶች ሞልተው ነበር ። ከቃለ መሐላቸው በኋላ ትራምፕ በዋሽንግተን ዲሲ ካፒታል አሬና በተባለው የስፖርት እና የመዝናኛ ስታዲየም በመሄድ እዚያው ለተሰበሰቡ ደጋፌዎቻቸው ንግግር አድርገዋል።